मावठ रा रास

पाती पढ़ये पाहुन कुर्जा 

गेहूँ खुड से झाँक रह्या।

कूँचा फूलड़ा दाँत निपोर 

तारा दिनड़ो हाँक रह्या।।

सिळी-सिळी चाले पुरवाई

साँझ धुणी-सी सिलग रही।

हूक हिवड़ पर तीर चलावे 

ढळती रातां बिलग रही।

झरे चाँदनी कामण गावे 

ओल्यूँ बलुआ पाँक रह्या।।

आंख्यां सुपणो सजे सोवणो

बाट जोहती रात रही।

जीवण बाँध कलाई तागा 

काच्चा सूत न कात रही।

काल चरखा धरतया घूमे 

बिखर पहर री फाँक रह्या।।

फूला-पत्ता बिंध्य किरण्याँ

 आँगण माही खेल्य भोर।

होळ्या-होळ्या डग धूप भरे

डाळ्या डागळा छज्जा छोर।

मावठ रास रचाती आवे।

दिन दुपहरी आँक रह्या।।

@अनीता सैनी 'दीप्ति'

शब्द =अर्थ

कुँचा =एक प्रकार का पौधा 

फूलड़ा =फूल

हाँक =हुंकार 

सिळी-सोळी =ठंडी-ठंडी

ढळती =ढलती

बलुआ पाँक = बलुआ दलदली मिट्टी 

सिलग =सुलगना 

बिलग =बिलख

आंख्यां=आँख 

तागा =धागा

धरतया=धरती

फाँक =लंबाई के बल कटा हुआ टुकड़ा 

होळ्या-होळ्या=धीरे-धीरे

डाळ्या=टहनियाँ

डागळा=छत