मरवण जोवे बाट

बीत्या दिनड़ा ढळा डागळा

भूली बिसरी याद रही। 

दिन बिलखाया भूले मरवण 

नवो साल सुध साद रही।।

बोल बोल्य चंचल आख्याँ 

होंठ भीत री ओट खड़ा।

काजळ गाला ऊपर पसरो

मण का मोती साथ जड़ा।

काथी चुँदरी भारी दामण 

माथ बोरलो लाद रही।।

पल्लू ओटा भाव छिपाया

हिय हूक उठावे साँध्या।

टूट्या तारा चुगे जीवड़ो

गीण-गीण सुपणा बाँध्या।

झालर जीया थळियाँ टाँग्या

ओल्यू री अळबाद रही।।

लाज-शर्म रो घूँघट काड्या 

फिर-फिर निरख अपणों रूप।

लेय बलाएँ घूमर घाले 

जाड़ घणा री उजळी धूप

मोर जड़ो है नथली लड़ियाँ 

 प्रीत हरी बुनियाद रही।।

@अनीता सैनी 'दीप्ति'

शब्द =अर्थ 

बिलखाया= विलगाव

डागळा =छत 

भीत =दीवार

बोरलो= ललाट पर पहने का आभूषण

हूक =पीड़ा, शूल, कसक

झालर =लटकनेवाला हाशिया

ओल्यू =याद

थळियाँ=चौखट

नथली =नाक में पहना जाने वाला एक छोटा आभूषण