विरक्ता भाव

प्रीत नगरिया हेलो मारे 

हिया उफण अतियोग रह्या।

भाव विरक्ता सोवे-जागे 

किण पहरा संजोग रह्या।।

शांत पात री छाया ओढ्या 

शीतळ झोंक रो उद्गार।

दूबड़ धरती हिवड़ा सजनी 

काळजड़ रो है सिणगार।

मन री आख्या मुंडो देख्यो 

ल्यूँ बलाएँ सुयोग रह्या।।

खड़ी खेजड़ी खेता माही 

सांगर-सी अभिलाष झड़े।

 बाळू  हांण्ड्य है बोराई 

धोरा रो सिणगार जड़े।

निरमोही री भगती ठाडी 

 जाग्या पूरणयोग रह्या।।

 झरबेरी रा बेरू बिणयां 

 भाव गठरिया याद रही।

खाट्टा-मीठा थाने अर्पण

 झाबा री अळबाद रही।

कंठ मौन मोत्याँ री माळा

विधणा रा ऐ योग रह्या।।

@अनीता सैनी 'दीप्ति'

शब्दार्थ 

हेलो-तेज़ स्वर में आवाज़ देना

उफण -उफनना 

अतियोग-अतिशयता

विरक्ता-अनुरागहीनता

किण-किस 

ओढ्या-ओढ़ना 

हांण्ड्य-घूमना 

काळजड़-हृदय 

सिणगार-सिंगार 

मुंडो-मुँह 

देख्यो-देखा 

बेरू-बेर 

बिणयां-बिनना 

थाने-तुम्हें 

माळा-माला 

अळबाद-ठिठोली करना